— 1033 —
„Biarpoen siapa djoega, tinggi dan renda menoesia itoe tiada ada perbedaännja." Begitoe katanja Tio Tihoe: „Itoe orang minta menoempang dengen baek, ini tiada pantes kau kasi denger penjaoetan begitoe! Inget, laen kali kau djangan bikin lagi ijaranja perkata'an jang begitoe matjem!"
Tio Tihoe laloe prenta boedjangnja pasang djembatan kajoe, dan atas ia poenja prenta, itoe doea orang naik ka dalem praoe sasoeda tambat masing-masing poenja koeda di tjabang poehoen. Lebi doeloe ini doea orang sampeken trima kasi pada itoe pembesar jang begitoe baek boędi, sasoedanja baroe benaken barang-barangnja dan ambil tempat boeat berbaring.
Bong Loan liat, dalem itoe praoe boekan sadja ada banjak boedjang lelaki dan prempoean, djoega laen bagian praoe ada berkoempoel brapa blas orang millitair jang bersendjata jang di pakerdjaken sebagi pelindoeng atas keslametan orang-orang dalem itoe praoe.
Oedjan telah toeroen koetika itoe doea orang soeda ada di atas praoe. Baroe sadja Bong Loan maoe rebaken dirinja, satoe boedjang lelaki dengen bawa rantang bagoes dateng ka sitoe.
„Loija slempang Djiwie blon makan, maka ia prenta akoe bawa ini makanan dan arak, harep soeka di dahar apa jang ada." Kata itoe boedjang sembari taro rantangnja di papan praoe dan ia lantas pergi lagi.
