— 1008 —
,,Tjoba kau liat!" kata ini Tauw-bak pada
pengikoetnja. Itoe orang prempoean djalan sendirian, pergilah kau tangkep padanja. Koeda
jang ia doedoekin roepanja koeda baek, dapet
itoe sadja bagi kita ada satoe kaoentoengan besar!"
Doea dari itoe brapa ra'jat dengen berbareng lantas mengoedak, sedeng Tjiok Go poen toeroet menjoesoel dari blakang. Kou Kongijoe tiada dapet taoe kaloe ia di kedjer oleh itoe brapa orang, maka ia djadi kaget tempo di blakangnja kadengeran orang berseroe: „Nona, boekalah angkau poenja periasan badan, kaloe ingin dirimoe tinggal slamat!"
Boekan maen In Liong kita poenja kaget koetika denger itoe treakan dan liat doea orang kedjer padanja, ia lantas petjeet koedanja dan lariken ini binatang dengen kentjeng, kerna ia tiada dapet laen djalan, selaennja berboeat begitoe boeat lolosken dirinja. Jang mengedjer pandang hina korbannja ada sa-orang prampoean, lagi itoe tempat semoea oetan sadja, maka ia rasa biar begimana djoega tentoe aken dapet disoesoel. Tapi siapa njana koedanja In Liong larinja kentjeng, hingga sepoeloe li soeda dikedjer blon djoega dapet disoesoel.
Selagi In Liong merasa kabingoengan begimana ia baroes toeloeng dirinja, mendadak dari satoe djoeroesan ada mendatengin doea orang lelaki
