— 598 —
Soen-sie dan Ong-sie tertawa tjekikikan,
„Itoe poen tida bener," kata Hong Dji. „Djika kau ingin taoe, mengapa sedeng ada pande bersilat, kau tida bisa tahan dingin, itoelah ada dari sebab kau poenja koelit ada terlaloe tipis dan aloes, oleh kerna kau biasa dapet rawatan baek dan tinggal di kota Radja pada tempat jang terkoeroeng. Beda sekali dengen kita orang di sini. Kita disini poen tinggal di pagoenoengan, angin kaänginan, panas kapanasan, maka kaloe kita orang poenja koelit soeda mendjadi tebel dan kasar, itoelah boekan pekara heran."
Soen-sie sengadja benerken perkataannja Hong Djie dengen membilang, jang sasoenggoenja djoega koelitnja Tjheng Bwe ada lebi aloes dan lebi bersi dari koelitnja itoe prampoean kedji.
Hong Dji djadi sanget mendongkol mendenger satroenja itoe diëlonin: tjoema sadja ia merasa tida baek, kaloe mengambek boeat itoe perkara.
Tapi Tjheng Bwe jang tida soeka dioempak, ia lantas sadja berkata: „Djelek bagoes masa kenapa, asal sadja peroentoengannja bagoes, itoelah ada hal jang teroetama. Seperti akoe ini, biar begimana bagoes poen, toch tida lebi dari boedak, berbeda djaoe
