— 933 —
siapa ia tiada kenal dan baroe perna meliat di itoe waktoe. Pikirannja Keng Hoa disesaät itoe soeda koempoel semoea; ia inget, ia soeda memboenoe diri di dapoer dengen ada Ong Ma dan brapa orang lagi, tapi sekarang marika itoe soeda tiada ada, sedeng dirinja boekan ada di dapoer lagi, hanja atas pembaringan dalem satoe kamar jang inda.
Apa dirinja masi idoep atawa kah soeda mati? Inilah ada pertanjaän jang blon bisa dipastiken oleh itoe gadis sendiri. Tapi Joe Siotjia, jang soeda mengadepin sakoetika lamanja, lantas dapet artiken apa jang sedeng dipikirin oleh Keng Hoa, maka dengen sabar ia lantas toetoerken satoe persatoe apa jang terdjadi dari kapala sampe kaboentoet, hingga Keng Hoa mengarti semoea.
Gadis kita merasa teramat soekoer dengen itoe pertoeloengan, ia laloe toeroen dari atas pembaringan, bilang trima kasi, serta mengangkat soempa dan mengakoe soedara, hingga hal itoe bikin Joe Siotjia djadi girang sekali. Sasoeda satoe sama laen menanjaken banjak hal achirnja ternjata, Joe Siotjia oesianja soeda doea poeloe, lebi toea satoe taon dari Keng Hoa.
„Djika toeroet penoetoeran, njatalah ‘ntji Eng masi tinggal merdika,” begitoelah kamoedian Keng Hoa berkata, „meliat itoe semoea akoe lantas inget satoe perkara, tapi kaloe ditoetoerken akoe kwatir 'ntji djadi koerang senang.
