— 596 —
kaloe tida diprenta oleh Hoedjin boeat lakoeken ini penilikan! Sasoenggoenja djoega apa tralebi enak akoe tinggal diam di kamar, dimana akoe traoesa rasaken hawa jang begini dingin ?"
Sambil berkata begitoe, Hong Dji berdjalan masoek ka satoe paseban jang paling deket, jang soeda dibikin anget dengen hawa perapian jang dinjalaken disitoe pranti itoe boedjang-boedjang jang lagi bekerdja berganti-ganti angetin badan.
Tida lama poela, Tjheng Bwe poen dateng di sitoe. Tapi ia dateng boekan dengen sengadja, hanja ada dengen prentanja Siotjia boeat minta Nio-sie toeloeng britaoe pada The Khoen, jang kaloe tjoeatja ada terang, dia ini moesti toeloeng soeroe orang selaken itoe doea ekor koeda jang Siotjia bawa dari kota Radja boeat Siotjia toenggang, kerna Siotjia koeatir, kaloe dikasi menganggoer terlaloe lama, itoe doea binatang nanti mendjadi binal.
Sedeng Tjheng Bwe memesen begitoe, Soen-sie, jang di dalem gilirannja, lagi angetin badan di itoe paseban, kamana baroesan Hong Dji telah masoek, ia lantas kaloear den silaken Tjheng Bwe dateng ka paseban itoe.
