— 926 —
Sigara djoega ini brapa orang lantas berlaloe dari itoe roewangan, menoedjoe ka blakang boeat anterin Keng Hoa berangin di kebon kembang. Tapi djalan blon brapa djaoe ini nona merandek, matanja meliat ka sana-sini, seperti ada apa-apa jang ia mendapet taoe.
„Dapoer di mana letaknja?” begitoe ia menanja. „Marilah lebi doeloe anterin akoe dan oendjoek di mana pernanja?”
„Apa kau maoe bikin minta dianter ka dapoer?” Ong Ma menanja dengen ketawa dibikin-bikin.
„Bagi akoe, saorang baroe, perloe sekali” begitoelah Keng Hoa berkata lagi dengen perkataän djinaka. „Siapa taoe kaloe satoe tempo peroet koe lapar; kaloe soeda taoe di mana selak-seloeknja, begitoe kapengen makan akoe boleh lantas masoek kadapoer!”
Perkataännja Keng Hoa soeda bikin semoea orang jang ada di sitoe djadi tertawa, apa lagi Ong Ma. Ia ini soeda djadi sanget girang, sebab tiada doega, Keng Hoa saorang baroe soeda jadi djinek dan bisa membanjol. Boekan seperti laen-laen orang, jang kaloe blon diboedjoek begini begitoe blon maoe anteng.
„Orang seperti kau tiada moesti diwadjibken bekerdja di dapoer,” kata itoe prempoean toea dengen perkataän mengoempak, „di sini akoe ada piara banjak boedjang prempoean; maoe ini maoe
