— 924 —
„Poelang! Kenapa akoe ditinggal di sini?” menanja Keng Hoa jang di itoe waktoe baroe dapet pengrasaän tiada enak. „Lekas bilang ini roema apa, kenapa akoe ditinggal sendirian?”
„Dengerlah, nona,” kata itoe prempoean toea, „akoe ini Ong Ma namanja, jang poenja ini roema plesiran merk Tiang Tjoen le. Pada iboemoe sama sekali akoe tiada kenal, katjoeali pada Tjho Mama, kerna ia itoe ada akoe poenja langganan, tengkoelak mendjoeal gadis. Koetika akoe dateng di roemamoe dan mengakoe soedara, itoelah tiada laen dari tipoe jang diatoer oleh itoe nene, soepaja kau tiada menaro tjoeriga toeroet kita orang dateng di sini. Sekarang kau soeda didjoeal; iboemoe dan Tjho Mama soeda poelang, sasoeda ia trima ampat ratoes tail sebagi harganja dirimoe.―Mengartikah sekarang, nona?"
Menilik apa jang kedjadian di atas ini, njatalah itoe akal boesoek jang dihatoerkan oleh Tjho Mama soeda berdjalan dengen baek, hingga dengen tiada banjak soesa Keng Hoa soeda dateng di itoe roema plesiran. Gadis kita jang soeda djadi korban dari ini perboeatan boesoe, sablonnja mengambil tindakan laen, soeda lebi doeloe telah tetepken pikirannja dengen saroepa ingetan jang dateng dengen mendadak. Ia kasi liat moeka manis, satjara lakoenja orang jang trima oentoeng. Tapi diam-diam ia mengoetoek
