— 921 —
Lebi djaoe ia menegesin, kaloe benar Kwe Si maoe djoeal anak tirinja, ia ada sedia akal jang bagoes begitoe bagoes sampe ia brani pastiken, orang jang maoe di djoeal tiada mendapet taoe satoe apa.
Atas pertanjaännja Kwe Si begimana itoe pendjoealan maoe di atoer, Tjho Mama sigra toetoerken tipoe tipoenja jang moesti digoenaken dalem itoe oeroesan, hingga itoe iboe tiri jang doerhaka djadi sanget girang, serta silaken kontjonja oeroes itoe semoea.
Besoknja di waktoe pagi, betoel selagi ini doea menoesia keparat doedoek mengomong, sedeng Keng Hoa poen ada di sitoe, koenjoeng-koenjoeng di depan roema ada brenti satoe djoli, dari mana sigra toeroen satoe prempoean setenga toea jang berdandan rebo.
Tjo Mama jang doedoek madep keloear itoe tempo lantas bangoen dengen berkata: „Astaga siapa kira ini hari pagi-pagi ada tetamoe! Hoedjin lekas keloear menjamboet, ini kau poenja atji dateng mengoendjoengken!"
Sablonnja Kwe Si bangoen, itoe tetamoe soeda masoek kadalem. la hamperi dan pelok itoe prempoean kedji dengen berkata: Ob, soedarakoe sedari berpisa soeda anem taon kita orang baroe bertemoe lagi!"
„Akoe merasa sanget beroentoeng bertemoe 'ntji di ini hari," saoet Kwe Si, „tapi begimana apa Tjihoe ada baek?"
