— 905 —
begimana lantaran tada maoe mengakoe Kongtjoe soeda dipoekoel; dan laen-laen hal lagi jang satoe persatoe Tjin Hie toetoerken dengen trang sampe Siotjia jang mendenger itoe tjerita badannja merasa lemes dan hatinja seperti di'iris iris.
Kamoedian dengen menangis ia katemoeken Kwe Sie, sama siapa sasoeda bri taoe apa jang baroesan Tjin Hie bilang, ini gadis minta iboe-tirinja berdaja oepaja boeat membri pertoeloengan pada soedaranja. Tapi ini „hantoe-alas” boekan meloeloesken orang poenja permintaän, sebaliknja lantas mengamboel. la bilang: apa perloe minta pertoeloengan padanja, kerna ia toch tiada lebi dari penoenggoe roema jang tiada bergoena bodo dan laen-laen perkataän lagi jang boleh bikin orang djadi merasa djemoe.
Keng Hoa djadi semingkin sedi, tapi tiada koerang mara dan djengkelnja pada itoe mah-kwalon jang sabenernja tiada pantes balikin ia poenja permintaän dengen omongan begitoe roepa. Tiba-tiba selagi ia maoe menegesin kenapa iboe- tirinja poenja pengambilan djadi begitoe, kabetoelan Tjin Hie panggil padanja, maka ia oeroengken niatnja dan lantas menghamperi itoe boedak. Ini doea orang, madjikannja dan boedjangnja, sigra berkoempoel di depan dan tjari daja oepaja boeat menoeloeng Toa Kongtjoe.
„Kaloe ini oeroesan dilawan menangis sadja,
