— 884 —
meneroes ini Tjongkoan dan istrinja djalan dengen tjepet sekali, di mana pada satoe hari ia telah sampe di Afdeeling Djin Ho. Di sapandjang djalan dan teroes sampe di Afdeeling terseboet, The Koen blon dapet ketrangan soeatoe apa dari hal Bong Loan. Kabetoelan sampe di sana, The Koen pikir baek djoega kaloe ia pergi mengoendjoengken roemanja Kou Han-Lim, tanjaken keslametannja itoe familie dan sekalian maoe bri kabar djoega apa jang soeda terdjadi dengen toean, nona dan oeroesan kaloet di dalem gedong Tin Kok Hoe.
Begitoe poen kahendak ini laloe dibertaoeken pada Nio Si, jang tiada laen dari pada menoeroet sadja.
Tapi pembatja tentoe blon dapet taoe kaloe itoe tempo roemanja familie Kou ada hadepken keada'an jang tiada enak; dan Kou Kongtjoe In Liong, toendangannja Bong Loan, ada dikerem dalem pendjara, lantaran ditoedoe soeda berboeat perkara hina jang berachir dengen binasanja satoe djiwa. Maka itoe kita toenda doeloe The Koen jang maoedateng mengoendjoengken dan lebi doeloe kita toetoerken, begimana asal moelanja itoe bahaja jang menimpa pada itoe familie.
Sadjek oendoerken diri dari pakerdja'an negri dan hingga di roema, tiada lama dari itoe Kou Han-Lim dapet sakit jang membawa ia kalobang
