— 837 —
Liang. Begimana tjepet marika soeda lintasi itoe perdjalanan, inilah tiada oesa diseboet lagi Koetika masi ada di tenga djaian hatinja marika itoe ada sanget kwatir, tapi kekwatiran itoe dapat dibikin linjap waktoe ia orang soeda berada di dalem kota terseboet, di mana ia dapet ketrangan lengkep tentang halnja Ko Kong.
Di sini The Koen lantas berdami dan satelah djadi moefaket, ini Tjongkoan sendiri pergi ka roema boei, Hok Tjoen, An Gin dan doea pengikoet laen pegi ke gedong Boe Leng Hoe dan menoenggoe di sana.
Tatkala sampe di roema pendjara, The Koen sigra ketemoeken Thio Eng; ia bri taoe namanja dan terangkan djoega maksoed kedatengannja. Ini pembesar-boei lebi doeloe soeda trima prentanja Souw Gie-soe, jaitoe: kaloe ada familie dan sobat andenja Ko Kong minta bertemoe boleh kasi idjin ia masoek.
Maka itoe The Koen, sebagi penghawenja Ko Kong, tiada soesa ketemoe toeannja,
Ampir-ampir sadja The Koen tiada dapet mengenali koetika dari kedjaoean Thio Eng oendjoek pada Ko Kong jang lagi doedoek mengadepin medja ketjil, oleh kerna ini madjikan soeda djadi banjak lebi toea sedari berpisa brapa taon lamanja. Ia menghampiri dengen pikiran terharoe dan sigra pelok, toeannja sembari menangis tersedoe-sedoe
