— 831 —
,,Djangan slempang!" menjaoet Jo Gie. Silaken brangkat!”
Tiada tempo lagi An Gin taloe petjoet koedanja, ini binatang lari dengen keras menoedjoe ka loear kota. Dari sebab inget oeroesan itoe ada sanget penting, An Gin berdjalan teroes tiada brenti sampe kamoedian ia berada di depan gedong Tin Kok Hoe.
Ia liat: gedong terseboet tiada berada sebagimana doeloean, tjoema roepanja ada sedikit toea. Koenjoeng-koenjoeng An Gin dapet inget hal-hal jang soeda liwat hingga brapa tetes aer laloe mengetel dari ka doea matanja. Ia lantas toeroen dari atas koedanja; tambat itoe binatang pada tjabang poehoen jang ada di sitoe, kamoedian laloe menghampiri pada doea orang, jang lagi mengimpleng padanja dari setadi.
,,Oh, ajah. .. .ajakoe!" An Gin berloetoet di depan sala satoe itoe doea orang jang boekan laen orang hanja ajahnja sendiri, sedeng satoe poelah Ong Peng.
Sasaat itoe The Koen djadi bengong. Kagetnja ini Tjongkoan boekan alang kepalang, oleh kerna meliat anaknja poelang dalem keadaan begitoe roepa. Hatinja djadi sanget kwatir dan mendoega, brangkali madjikan dapet tjilaka.
,,Kau poelang sama siapa, anak, dan kenapa lakoemoe begini roepa?” menanja The Koen
