— 817 —
sekali Ko Teng Tjan seperti tiada tersangkoet dalem ini perkara jang ditoedoe. Lagi kaloe maoe ditjari taoe dan pada bagian jang paling djaoe, moesti dibilang familie Ko ada mengambil bagian paling besar dalem perkara negri; kaloe di'inget sampe di sitoe, soenggoe satoe hal jang sanget moestail ia mengandoeng niatan begitoe boesoek, satoe perboeatan jang boleh membikin roesak namanja ia poenja laloehoer jang begitoe moelia. Dalem pepreksaän lagi kemaren ia telah menoelis satoe ketrangan lengkep dengen toe semoea ada membri tanda, ia masi mengindaken kahormatannja begitoe besar. Baginda tentoe soeda trima itoe soerat ketrangan?“
„Ketrangan apa?” tanja Baginda. Tiada, „kami tiada trima itoe!”
„Kemaren itoe soerat dibawa oleh Leng Tjo,” kata Souw Gie-soe dengen kaget dan merasa tjoeriga, kenapa sampe sekarang Baginda blon trima!”
Leng Tjo lantas dipanggil. Ini orang kabiri doerhaka kira ia dipanggil boeat pergi ka kantoornja Souw Gie-soe, maka itoe tempo hatinja merasa sanget girang. Ia mengharep harep soepaja ini hari Baginda kaloearken soerat „mera” boeat djatoken hoekoeman mati atas dirinja Ko Teng Tjan, kerna kaloe kedjadian begitoe, sariboe tail mas sebagi gandjaran dari Lu Kok Tjaij ia aken trima.
