— 815 —
djadi tiangnja negri: Hamba, sekalipoen setiap hari mengerem di dalem kraton, tapi prihal oeroesan di loearan ada dengen djoega sedikit; itoe Ko Teng Tjan ada sa-orang jang berprangi aloes dan sabar, bisa mengesiani dan menoeloeng pada orang-orang soesa, maka tjara begimana orang begitoe adil ada mengandoeng niatan kedji. Dengen membilang begini begitoe boekan sekali hamba belaken fihaknja, tjoema sakedar apa jang hamba taoe wadjiblah membri inget soepaja Baginda tiada djadi boeat penjeselan di kamodian hari."
Boen Koei Hoei djoega toeroet njataken pikirannja, dan ia minta Baginda soeka perhatiken perkata'annja Souw Nio-nio.
Baginda tinggal diam dengen tiada mengasi djawaban apa-apa. Tapi kaliatan ia seperti lagi perhatiken dari pembitjaraännja itoe doea Permisoeri.
Sablonnja itoe doea njonja agoeng oetaraken pikirannja terlabi djaoe, Leng Tjo soeda masoek mendjoera. Ini orang kabiri laloe membri ketrangan, jaitoe seperti apa jang telah dipesen oleh Lu Kok Tjaij djoega itoe soerat ia tiada kasiken, satoe perboeatan jang haroes dibilang sanget brani mati.
Boeat laporannja Leng Tjo ini, dengen perkataän pendek Baginda bilang baek dan silaken itoe Taijkam moedoer.
