— 804 —
persakitan,“ kata Ko Kong lebi djaoe „bikin pandjang pendeknja sasoeatoe perkara ada dalem Taijdjin poenja kahendak maka tjara begimana maoe di minta akoe poenja pikiran?“
—„Sedab dalem ini perkara tjoema ada satoe djalan jang Ko Kong sendiri haroes berboeat.”
—„Begimana? Soenggoe akoe tiada mengarti!”
Toeroet akoe poenja pikiran,” kata Souw Gie-soe, „paling baek Ko Kong bikin satoe katerangan boeat Baginda dan katrangan itoe toelis denger dara; toelislah apa jang kau rasa baek, soepaja Baginda dapet pikiran dan merasa kasian.”
„Ja, itoelah tjoema djalan satoe-satoenja boeat Ko Taijdjin berlakoe dalem ini perkara,” kata Leng Tjo dengen penoe kagirangan. Ini dorna sabenernja tiada mengarti baek dengen omonganja Souw Gie-soe; ia kira ini pembesar soeroe Ko Teng Tjan mengakoe dalem itoe perkara.
Bermoela orang bangsawan kita poen merasa koerang mengarti dengen itoe perkata'an, tapi sasoedanja di perhatiken sabentaran, ia sigra dapet satoe ingetan bagoes, jang rasanja bisa menoeloeng ia poenja diri. la kaliatan djadi girang.
„Baeklah akoe toereet Taijdjin poenja nasehat,” kata ia, „permisilah akoe minta di sediaken perabot toelis dan kertasnja jang lebar.”
Souw Gie-soe soeda lantas penoeken itoe perminta'an.
