— 746 —
bertamba-tamba koesoet pikirannja; seoemoer Baginda baroe perna dapetken itoe kesangsian, jang membikin ia tiada bisa mengambil poetoesan, sala satoe mana dari itoe perkara jang lebi doeloe ia moesti sleseken.
„Sekarang Kokioe moendoer sadja doeloe.” begitoelah achir-achir Baginda kata pada Souw Giesoe. „dalem ini oeroesan kami merasa amat soeker, maka kami moesti minta pikiran pada brapa pembesar laen, jang sekarang djoega kami aken panggil marika itoe.”
Souw Gie-soe tiada bisa berboeat laen, dari pada toeroet prenta dan lantas berlaloe.
Bener djoega, satelah ini pembesar pergi Baginda laloe titaken satoe Taijkam pergi panggil Sie Long Boen Kim, Lu Kok Tjaij, Dji Lam Ong dan Po Kok Pong. Doea pembesar jang diseboet doeloean pembatja kenal ada ambtenaar jang bekerdja dalem bagian Civiel, samentara doeanja poela, jalah ada ambtenaar bagian militair.
Tatkala itoe aipat ambtenaar besar dateng mengadep, Baginda lantas silaken ia orang berdoedoek. Kamodian Baginda kata: „Jang membikin kami oendang Keng dateng disini, jalah boekan oeroesan laen, jaitoe dari hal Song Sie poenja oeroesan. Apa Keng sekalian soeda taoe, itoe pendakwa tadi pagi telah binasa dalem pendjara?”
