— 714 —
Begitoe Souw Gie-soe toeroen dari djolinja, Si Long Boen Kim lantas menghamperi seraja membri hormat, sedeng Lu Kok Tjaij poen toeroet berboeat begitoe. Ini dorna jang memang paling pande maen komedi, sablonnja Souw Gie-soe berkata apa apa, ia soeda menegor lebi doeloe:
„Kokioe, dari hal pengadoeannja Song Sie kemaren sore, inilah membikin akoe sanget tiada mengarti. Lagi sabegitoe djaoe jang akoe taoe, Tin Kok Ong ada sa-orang jang berhati djoedjoer, maka dengen menilik itoe semoea, blon bisa di pastiken apa bitjaranja itoe djahanam bole di pertjaja atawa tiada; tetapi menoeroet kateranganja Lu Jong jang menjaksiken djalannja pepreksaän pada malem tadi, ja-itoe maski di djalanken hoekoeman tapi Song Sie tinggal tetep dengen pengakoeannja, ini membikin terbalik orang poenja pemandangan atas dirinja Ko Kong jang moelia."
„Ja, sasoenggoenja ini perkara ada terlaloe soesa, sedeng akoe sendiri blon bisa bilang apa-apa," saoet Souw Gie-soe. „Tapi sebab ini ada oeroesan besar laen djalan selaennja kita seraken dalem pertimbangannja Baginda radja, jang tentoe bisa membri poetoesan begimana baeknja."
„Betoel, itoe memang paling betoel!" kata si monjet toea sembari manggoet-manggoet.
He, perkara apatah jang Dji-wi bitjaraken? Akoe denger di seboet namanja Tin Kok Ong?"
