— 701 —
soeda tentoe tiada boleh disamaken dengan Lu Kok Tjaij dan laen-laen pembesar jang djadi kawannja itoe monjet toea.
Di itoe malem betoel selagi membatja boekoe, Souw Gie-soe trima laporan dari oppasnija, bahoea ada orang dateng di kantoornja aken kasi perkara apa-apa. Kaloe dalem waktoe tenga malem orang dateng di kantoor negri aken berkelak perkara, soeda tiada oesa dibilang lagi tentoe djoega oeroesan jang maoe dibri taoe ada loear biasa pentingnja, maka dengen tjepat Souw Toan menitaken hambanja pasang brapa penerangan dalem kantoornja, di mana ia lantas doedoek bersidang dan prenta orang jang maoe berkelak dateng mengadep.
Dengen tjara jang garang kaliatannja, itoe ampat boedak dari gedong Siang-hoe dengen di’ikoet oleh Lu Jong giring Song Sie masoek ka dalem; dari masi djaoe Song Sie soeda djadi goemeter seperti demem keras meliat roepanja Souw Gie-soe jang begitoe angker sebagi melaekat idoep. Ia djalan mendek-mendek dan lantas djatoken dirinja di dekat medjanja itoe pembesar.
Lu Jong bersama ampat kawannja djoega toeret berloetoet.
Souw Gie-soe kenali Lu Jong ada boedaknja Lu Sinsiang, maka ia lantas menanja, siapa adanja
