— 699 —
„Apatah akoe ada itoe kahormatan boeat minoem ini setjawan arak?” kata Song Sie sembari so pegang itoe tjawan dengen doea tangannja.
„Tentoe!” menjaoet Kok Tjaij dengen lantas. Dengen tiada menoenggoe sampe diprenta lagi, Song Sie soeda lantas keringken isinja tjawan.
„Ini arak betoel enak dan wangi, tjoema ada sedikit pait dan hawanja panas!” Kata Song Sie.
„Djoestroe minoeman begitoe akoe paling soeka dari pada minoem jang laen matjem sari.” Kata Lu Siang sembari pandang moekanja Song Sie dengen roepa sedikit tjoeriga, tapi satelah liat gerakannja itoe pelarian dari permoela sampe di itoe waktoe tinggal tiada beroba, hatinja djadi girang.
Kamodian sasoedanja peringetken poela pesenannja pada Song Sie, ini pembesar lantas prenta Lu Jong bersama ampat boedak laen anterin ia poenja korban ka kantoor Kim-le-Wie.
Sampe di sini, sablonnja menoetoerken begimana djalannja itoe pitena’an jang diperboeat oleh kaoem kedji alas dirinja kita poenja Generaal jang moelia, lebi doeloe kita rasa perloe adjar kenal pembatja pada itoe pembesar jang mamegang kekwasa’an dalem pengadilan Kim-le-Wie.
Souw Toan alias Tjeng Heng, begitoelah ada namanja pembesar dalem pengadilan terseboet
