— 684 —
tida loepoet akoe poenja leher tentoe moesti ditabas. Begitoelah akoe lantas ambil poetoesan boeat poelang sabentaran di kota Radja; dengen ingetan, kaloe akoe soeda djoeal milikkoe jang ada di sini, hingga pendapetannja ada tjoekoep boeat bli doea ekor koeda peganti, baroe balik lagi ka kota Gan-Boen-Koan, aken seraken itoe binatang pada Ko Tjhianswe dan minta ia ampoenkan, akoe poenja kadosaan. Demikianlah adanja hal jang bener, sinsiang, hingga kaloe baroesan, sablon mendenger akoe poenja tierita, Sinsiang ada tjoeriga aken akoe ini, sekarangpoen Sinsiang boleh singkirken itoe katjoerigaan.”
Ha ! ha ! itoelah ada pengakoean orang jang pande sekali atoer bitjara!” kata si dorna sambil tertawa: ,,Dengen begitoe roepanja kau hendak bikin seperti dirimoe tiada bersala, atawa sekali poen ada, ketjil sekali. Tapi itoelah akoe tida bisa pertjaja, kerna kaloe bener begitoe, tentoe kau tida perloe mendak-mendak di tempal gelap.”
,,O, Sinsiang,” kata Song Sie dengen swara minta dikasianin, ,,maloemlah saorang jang telah tinggalken pakerdjaan, satida-tidanja tentoe ia moesti koeatir djoega kapergokan orang, terlebi poela akoe ini memang bernjali ketjil."
