— 674 —
njatalah Song Sie itoe ada satoe pengetjoet jang tida brani berboeat sebagimana kawannja poenja nasehat, hingga lantaran pengetjoetnja itoe, boekan sadja Ko Kong moesti dapet perkara jang tida enak, tapi djiwanja sendiri kamoedian telah djadi binasa.
Soeda begitoe ia tida brani bilang pada kawannja dari hal ia tida maoe ketemoeken Ko Kong, hanja sebagi alesan boeat singkirken diri, tempo temen-temen itoe hendak poelang ka dalem kota, ia berkata sadja, jang ia hendak tjari itoe binatang jang ilang sampe dapet, sedeng itoe delapan koeda jang katinggalan, ia minta marika itoe toeloeng bawa poelang doeloe ka dalem kota.
Itoe temen-temen tida taoe begimana sabenernja Song Sie poenja niatan, maka dengen tiada bikin kaberatan apd-apa, ia orang lantas loeloesken itoe permintaan.
Song Sie mengela napas, tempo meliat kawannja dengen giring koeda jang marika angon berdjalan pergi.
„O, Allah !” kata ia, sasoeda berdiri bengong lama djoega di kaki boekit: „ Itoe angin Santer njatalah soeda membikin akoe soesa sekali. Laen pengangon poenja, semoea tjoekoep; melaenken akoe poenja sadja dinjap doea ekor ― dan inilah ada njata,
