— 660 —
betoel akoe merasa maloe hati pada iboe sendiri, tapi boeat kasi adjar adat, soepaja laen kali ia tida brani lagi, itoelah moesti!"
Sasoedanja berpikir begitoe, Ko Siotjia minoem poela arak bebrapa tjawan, kamoedian laloe berbangkit menghampirken pada iboenja.
,,Iboe taoe," kata ia pada itoe orang toea, ,,ini malem kitaorang minoem dengen tida dapet kaplesiran satoe apa. Sebab begitoe, baeklah akoe nanti pertoendjoeken saroepa ilmoe silat dengen goenaken pedang, soepaja ini perdjamoean tida djadi terlaloe sepi."
Soen Nio, jang kira sasoenggoenja si nona hendak pertoendjoeken ilmoe dengen maksoed boeat menghiboer, lantas sadja membilang baek, lebi poela memang ia blon perna liat pertoendjoekan begitoe.
Hok Tjoen djoega lantas tjampoer moeloet dengen membilang, ia poen sanget ingin liat itoe pertoendjoekan, malah kaloe boleh, ia ingin djoega peladjarken serta angkat nona Loan mendjadi goeroe.
Ko Siotjia tida saoetin perkataännja itoe Kongtjoe kaparat, hanja lantas sadja prenta Tjheng Bwe ambil ia poenja pedang Tjheng-hong-kiam.
Sabentar lagi Tjheng Bwe soeda balik
