Mambaleh adiak Saidi, "Kakak denai Siti Baheram, kakak kanduang di badan diri, ambo nan lai ateh rumah, sugiro malah Kakak naiak."
Sadang bakato lari ka dalam, dikambangkan malah lapiak pandan, lapiak pandan putiah barasiah, dihimbaukan ka mandeh kanduang, mandeh ka lua dari dalam, malawan duduak Siti Baheram.
Sambia duduak siriah talatak, dek adiak Saidi nan elok baso, disorong siriah di carano, sanan bakato mandeh Saidi, "Anak kanduang Siti Baheram, dari jauah Anak lah tibo, laikoh sihat sajo si Upiak, baa indak dibaok anak ka mari, tagak mandeh jo cucu raso tabayang di ruang mato."
Manjawab Siti Baheram, "Kunun si Upiak mandeh tanyokan, inyo sadang lalok ambo tinggakan, ibo awak manjagokannyo, inyo nan raso ka managih sajo. Lorong kapado badannyo, barakaik doa dari mandeh, insya allah leh sihat sajo, indak kurang suatu apo."
Mandanga kato minantu, sananglah hati mandeh Saidi, manyambuang pulo Siti Baheram, "Mangko ambo datang ka mari, gadang mukasuik dalam hati, handak batanyo bakeh mandeh, satantang bapak si Upiak, sapuluah hari inyo tak pulang, antah kapalo ngilu paniang, hati nan indak sanang lai."
Mandanga kato minantunyo, manjawab mandeh Saidi, badarok muko kalihatan, “Anak kanduang Siti Baheram, kok kunun hanyo Saidi nantun, indak pulo inyo ka mari, mungkin ka darek jo ka Padang, jalannyo indak manantu, maklumlah jalan urang manggaleh, nagariindak nan jauah, dima rasaki ka tabukak, inyo lah tibo pulo di sanan."
Sadang dek mandeh Saidi, takana laku parangai anak, inyo bana bak kato urang, "Bak kabau lapeh ka padang dima rumpuik nan mudo, banyunyuik sajo di sanan, tak pandai babini duo, saelok iko si Baheram," katonyo di dalam hati.
46
