PERINGETAN DARI TEMPO DOELOE.
Dengen ini pikiran Tham Tjay berdjalan teroes. Ia mengarti, kaloe maoe tjari pendoedoek jang lama ia tida boleh menanja pada jang tinggal dalem itoe roemah-roemah petak modern, hanja moesti koendjoengin pada orang-orang toea jang berdiam dalem roemah-roemah koeno jang masih katinggalan dalem itoe kampoeng poenja bagian belakang jang belon berobah banjak. Komoedian ia inget, di laen bagian dari itoe kampoeng ada tinggal Sioe Loei poenja satoe entji jang hidoep dengen berdagang koewe koewe dan ada poenja toedjoeh atawa delapan anak. Amat boleh djadi antara itoe anak-anak, jang pada ampat poeloeh taon laloe masih ketjil — jang paling toea baroe beroesia kira 12 taon — moesti ada satoe atawa doea jang masih tinggal teroes di itoe tempat jang doeloe. Maka Tham Tjay ambil poetoesan aken tjari pada marika, maski boeat dateng ka itoe tempat ada sedikit soesah, kerna melintasi djalan ketjil jang naek toeroen dan di tempo doeloe tida dirawat baek.
Tham Tjay merasa girang meliat semingkin djaoe ia masoek ka dalem itoe kampoeng roemah-roemah modern semingkin sedikit, hingga bangoennja itoe tempat-tempat masih belon banjak berobah, maski tentoe sadja segala roemah bamboe soedah diganti baroe atawa diperbaekin. Ia biloek ka satoe djalan simpangan jang moedoen teroes dengen disertaken tangga-tangga batoe, ka'ada'annja presis seperti ampatpoeloeh taon laloe. Dengen girang ia meliat disabelah bawah ada terdapet satoe poehoen waringin besar jang ia kenal, di deket mana ia taoe moesti ada satoe pantjoeran dimana koetika masih anak-anak ia sering mandi, dan disitoe satiap hari ada banjak orang Indonesier dan prampoean
77
