PERINGETAN DARI TEMPO DOELOE.
Liwat sapoeloeh hari itoe orang soeroean balik kombali dengen membawa kabar: itoe bekas tauwkee telah meninggal doenia, dan Sian Nio telah menika dengen saorang Tionghoa totok jang boeka waroeng tjita ketjil di Soekadingin, dari siapa ia telah lahirken doea anak !
Meninggalnja itoe tauwkee, jang membikin itoe dakwa'an tida bisa ditjaboet kombali, ada berärti Tham Tjay moesti mengoempet dari mata politie Soekadingin sabagitoe lama itoe oeroesan belon verjaard. Tapi poekoelan paling keras jang ia dapet ada dari itoe kabar tentang menikanja Sian Nio, jang membikin antero pengharepan dan toedjoean hidoepnja mendjadi antjoer sama sekalih.
Di itoe sa'at, boeat pertama kalih dalem penghidoepannja, Tham Tjay jang tjerdik dan berhati tetep merasa lelah dan poetoes akal. Boeat tiga hari lamanja ia tida masoek bekerdja dengen madjoeken alesan sakit. . . . . dengen sasoenggoenja djoega hatinja amat sakit dan sedih.
la merasa kahidoepannja tida berärti lagi, dan dapet pikiran hendak memboenoeh diri. Tapi belakangan ia batalken, kerna inget brangkalih satoe tempo, kapan soedah koempoel banjak oewang dan djadi hartawan besar, ia bisa boedjoek Sian Nio boeat tinggalken soeaminja dan toeroet kombali padanja. Ini perboeatan ia tida pandang djahat, sebab sabagi kekasih jang pertama ia merasa ada poenja hak lebih banjak atas Sian Nio dari pada itoe soeami jang belakangan, jang boleh djadi soedah disèmbat oleh Seng Lie hanja sabagi tambelan boeat menoetoep orang poenja mata.
Doea taon telah diliwatken lagi dengen Tham Tjay bekerdja keras hingga tauwkeenja bisa andelin ia dalem banjak oeroesan. Achirnja sang
59
