PERINGETAN DARI TEMPO DOELOE.
tanja atawa minta katerangan ini dan itoe padanja, katjoeali kaloe ia sendiri soeka tjerita. Dan malah kapan ia moelai bitjara melantoer dan hendak timpahken antero kasalahan padakoe, lebih baek kaoe tinggal sabar dan lantes menjingkir. traoesah tanggap dan dengerin omongannja. Apakah kaoe soeka berdjandji aken berlakoe begitoe ?"
Sian Nio bengong seperti bersangsi.
„Ingetlah, Sian, ini sikep ada perloe boeat kita poenja kabaekan dan kaberoentoengan," memboedjoek Tham Tjay. „Djikaloe kaoe riboet membantah dan oendjoek kasalahannja, ajahmoe boekan sadja bisa djadi goesar padamoe, tapi berbalik bentji padakoe, dan dalem kasengitannja, bisa djoega ia poetoesken kita poenja perhoeboengan boeat selama-lamanja."
„Baeklah, kaloe begitoe," kata Sian Nio sambil manggoetin kepala.
„Djikaloe kaoe setoedjoe berlakoe begitoe, akoe minta kapan sabentar ajahmoe poelang dan toetoerin kasoedahan dari pertjoba'annja boeat tjari kaberesan, kaoe masoek ka dalem, djangan dengerin apa jang ia nanti bilang, soepaja ia tetep mengira kaoe tida taoe apa-apa dari ini oeroesan."
Sian Nio memanggoet, komoedian berbangkit dan , berkata : —„Ini segala atoeran sabetoelnja saja rasa ada koerang perloe, sebab papa, jang selaloe berlakoe djoedjoer, biasa tjeritaken segala oeroesannja pada sembarang orang dengen tida satoe apa jang disemboeniken. Tapi boeat menjenangken enko poenja hati, saja nanti penoehken apa jang enko minta baroesan, dan biarlah sekarang saja diam di dalem aken teroesin saja poenja pendjaitan jang belon selese, soepaja djikaloe papa poelang ia dapetken enko berdoe-
41
