PERINGETAN DARI TEMPO DOELOE.
Tham Tjay menjamboet dengen goembirah, dan komoedian ia teeken itoe dengen tangan jang tetep.
Koetika Notaris soedah berlaloe. ia panggil Sioe Nio dan itoe doea tjoetjoe. Giok Nio dan Giok Phek, boeat berkoempoel di kamarnja, pada siapa ia bitjara dari roepa-roepa hal jang berhoeboeng dengen milik-miliknja soepaja bisa dioeroes sabagimana moesti kapan ia soedah tida ada.
„Apakah kaoe taoe koeboerannja kaoe poenja mama?" ia menanja pada Sioe Nio.
„Saja taoe dan saban Tjeng-beng saja biasa koendjoengin," saoet Sioe Nio.
„Kaloe akoe meninggal, koeboerlah di sabelahnja," memesen Tham Tjay.
Inilah ada Ong Tham Tjay poenja pesenan jang pengabisan, kerna sasoedah bilang begitoe, ia lantes perentah samoea orang kaloear dari itoe kamar kerna ia maoe tidoer.
Koetika sampe djam 3 lohor ia belon bangoen boeat minoem obat dan dahar santapan tengahari, Sioe Nio dan Salim djadi koeatir. laloe masoek di kamarnja, dan dapetken Tham Tjay soedah tida bernapas lagi.
Dokter jang dipanggil tjoemah bisa menjataken ia meninggal lantaran djantoengnja mendadak berenti memoekoel (hartverlamming). Tapi Sioe Nio taoe jang itoe orang toea, dengen menggoenaken kakoeatan kamaoeannja jang keras dan tetep, telah lolosken diri dari iapoenja koeroengan beroepa toeboeh kasar, soepaja bisa berkoempoel kombali dengen itoe machloek satoe-satoenja jang perna kasih ia rasaken kaberoentoengan jang toelén dalem kahidoepannja.
107
