PERINGETAN DARI TEMPO DOELOE.
sabagi satoe koeli dengen zonder gadji. Banjak kalih akoe denger iapoenja tjomelan, bangkitan dan nista'an, dan malah doea tiga kalih ia perna memoekoel djoega koetika akoe, lantaran terlaloe dipersakitin, telah melawan dan bales memaki. Ini samoea membikin penghidoepankoe djadi sama djoega seperti di dalem naraka, tapi toch moesti terima baek ini nasif boeroek dan tahan dengen sabar itoe segala kasangsara'an, sebab soedah tertjangtjang oleh itoe doea anak dan merasa koerang baek kapan akoe bertjerè atawa tinggalken itoe soeami, jang pasti membikin akoe poenja nama jang soedah bernoda djadi semingkin boeroek dan sekalian familie poen toeroet dapet nama djelek.
Kasangsara'annja penghidoepankde bersama Lim Sam kaoe bisa bajangin kapan akoe toetoerken, bagimana sadari menika ia belon perna adjak akoe boeat djalan-djalan pasiar atawa menonton, belon perna beliken akoe sapotong pakean, dan tida kasih oewang belandja lebih dari f 0,25 sahari boeat ongkos roemah tangga dan beli temen nasi. Ia sendiri poen hidoep dengen tjekèk leher satjara pelit sekalih, dan samoea oewang ia jang pegang sendiri, sedeng kalebihan dari hatsilnja ia koempoel dan kirim ka Tiongkok, dimana ada tinggal iapoenja orang toea dan istri, jang katanja belon perna melahirken anak, dan toedjoeannja menika padakoe hanja soepaja lekas poenja toeroenan, serta dapet satoe orang jang bisa tambahin kapitaal dan bantoein tjari doeit oentoek kasenangan familienja di Tiongkok. Jang ia pandang akoe tida lebih dari satoe boedjang atawa poen koeda grobak, itoelah bisa diketaoei dari hal, koetika akoe dapet sakit berat, ia belon perna panggilin dokter, sienshe atawa beliken obat,
100
