— 67 —
Rudolf dan Stephanie, kaliatannja ada jang paling tida bisa bosan, dalem membitjaraken berbagi-bagi hal. Sabentar iaorang menjindir, kamoedian laloe tertawa sampe masing-masing poenja moeka mendjadi mera, dan begitoe teroes, sabagi apa jang diomongi tida ada achirnja.
Satelah berdjalan saprapat djam lamanja, masing-masing ada dapet ingetan aken balik poelang. laorang berlaloe dari itoe rimbah, dan ambil djalanan besar jang teroes ka kota.
Kira-kira baroe sampe satengah perdjalanan, tiba-tiba iaorang berpapasan dengen satoe kandaran, dimana ada berdoedoek satoe njonja toewa bersama satoe prampoean moeda. Koetika itoe, jang moeda ada toetoepi, moekanja dengen pajoeng.
Kandarannja ada biasa sadja, dan barangkali poen tjoema boleh dapet disewa di tengah djalan.
Tapi sabaliknja itoe doewa prampoean, ada berpakean perlente sekali. Si njonja toewa, jang salaloe ada meliat koeliling, maski poen ramboetnja soeda beroeban, toch roepanja masi lebi mirip diseboet tjantik, dari pada dikenaken dengen moeka orang jang soeda kolot.
