— 44 —
„Akoe soeda poetoesken itoe perkara, Maria, dan biar poen bagimana, nanti tinggal tetap begitoe!”
Mendenger itoe, permeisoeri sabagi merasaken moeloetnja disoempal, hingga maski poen dalem hatinja ada bersoesoen tindi dengen berbagi-bagi pikiran, tapi tida satoe perkatahan bisa dikaloeari olehnja.
Di itoe malem, dalem satoe kamar jang soenji sekali di itoe astana, adalah berdoedoek diatas satoe divan, satoe prampoean toewa bersama satoe nona moeda. Masing-masing berpeloekan satoe sama laen, dan menangis teramat sedinja.
Aken tetapi samoea soeda kasep, soeda kadjadian . . . nasibnja iaorang berdoewa soeda ditetapken. O, asal sadja boekan itoe mega mendoeng, jang hendak kasi liat poelah roepanja jang bengis!
IV.
„Iboe jang tertjinta!
Akoe sendiri tida bisa merasaken, apa dengen menoelis ini soerat, akoe tida berboeat satoe kasalahan. Benar, sariboe kali ada lebi baek, sasoeatoe kasoesahan orang tanggoeng sendiri,
