— 302 —
„Baek, tapi lebi doeloe kaoe misti bilang: perkara apa si jang kaoe begitoe sänget maoe minta akoe menoeroet?”
„Kaloe toewankoe maoe minta itoe dari akoe, akoe poen bermoehoen sekarang pada toewankoe, soepaja omongmoe itoe disimpan sadja salamanja dalem sakoe,” kata si nona dengen moenjang-manjoeng, dan kaliatan seperti maoe bersedoeh-sedoeh poelah.
„Djangan begitoe lekas poetoes sabar, anak,” kata baginda, „akoe tida ada sabagi kaoe, begitoe bertabiat aneh. Akoe nanti tjeritaken padamoe . . . Kaoe tentoe soeda mengarti, jang akoe sabagi radja, tida sekali ada kapantesan, bergaoelan rapet pada satoe nona, jang malaenkan bernama Caroline Delacroix. Itoe akoe telah pikir, sadari ada tali perhoeboengan antara kita berdoewa, maka poen akoe lantas inget, aken moeliaken kaoe dengen satoe nama bangsawan. Di Belgie hal itoe teramat soesa kadjadian, kerna akoe misti lebi doeloe berhadepan sama sakalian mantrikoe, jang kamoedian baroe nanti membikin sah itoe ka'angkatan. Lantaran itoe akoe soeda madjoeken sadja permintahan pada soedarakoe, aken koerniaken kaoe satoe gelaran barones, dan dari sekarang, kaoe
