— 268 —
olah bisa tegoeken hati sasoeatoe roh, sekalipoen sedeng ada bersediah aken bikin perdjalanan ka acherat.
Bebrapa kali baginda ada djadi terkesiap sedikit, koetika matanja ada merasa liat toeboe jang ramping tapi sasoeda djadi tedas betoel-betoel, lantas ternjata..... boekan, boekan, samoea boekan!
Kamana djoega ia „ngak-ngak-ngoek-ngoek" dengen mata penoeh kakesalan, tida si „boengah bersoeara merdoeh" maoe kasi liat roepanja, hingga achir-achir, de- ngen otak mengandoeng oering-oeringan, baginda maoe ngelojor, berlaloe dari kalangan tentoonstelling. Tapi koenjoengkoenjoeng ia merandak, tatkalah soeda ada dekat pada tempat boeat djalan ka loear.
Baginda merasa kenali satoe soeara merdoeh jang terdenger di blakangnja. Dan di itoe sa'at djoega, laloe liwat di sampingnja doewa orang dengen bergendongan tangan.
Itoe waktoe, kaloe misti bertaroan tjoe-koeri djenggot, jang baginda ada poenja begitoe bagoes, barangkali djoega ia brani, sa'ande kata itoe doewa orang boekan si „nona penarik hati" sama itoe djedjaka, jang tadi tengahari baginda ada dapet liat di kantin.
