— 255 —
kadjadian, dan akoe tinggal tetap djadi pamarenta aseli boeat sakean lamanja. Jang didjadiken oendang-oendang, jaitoe akoe poenja kahendak! Akoe troesa menanja lagi pada orang, apa ia soeka begitoe atawa tida."
„Dan lebi djaoe, bagimana kaoe poenja pikiran? Apa kaoe rasa soenggoe-soenggoe itoe tanah di Afrika nanti bisa bri harepan baek di kamoedian hari?"
„Kaoe masi maoe menanja akoe poenja rasa-rasa? Ei, ei, sobat, itoe samoea akoe soeda brani pastiken. Kaoe misti taoe, bagimana kajah ka'adahan itoe negri dalem berbagi-bagi pengasilan! Jang perloe sekarang, jaitoe malaenkan kaloeari lagi kapitaal, dan boeat itoe orang-orang di Belgie ada merasa sedikit djeri. Itoe tida mengapa, akoe sendiri nanti bisa dapeti oewang, goena mengoeroes segala apa jang perloe, tapi, bilah pamarentahan maoe tanggap itoe djadjahan, nistjaja ia jang misti menanggoeng itoe samoea oetang-oetang."
„Akoe harep sadja, itoe samoea nanti terdjadi menoeroet kaoe poenja kahendak," kata prins, „tapi kaloe akoe djadi kaoe, akoe ada lebi soeka tanem akoe poenja oewang dalem laen peroesahan."