— 249 —
Aken tetapi jang paling mendjadi ia poenja kasoekahan, jaitoelah kabagoesannja astana-astana, gredja, atawa menarah. Dalem hal ini, malaenkan ada sedikit sekali radja-radja di doenia, jang membandingken baginda poenja perkerdjahan, membikin bagoes kota-kota.
Samantara kota Paris ada mempoenja Buttes Chaumont, Brussel djoega ada poenja Koekelberg, jang bisa adaken tempat bagoes sekali boeat diriken roemah, jang nanti dapet dipandang dari sa'antero kota. Diriken satoe gredja di sitoe, adalah baginda poenja kainginan, sekali poen onkost bikinnja, tida aken djadi lebi koerang dari tiga poeloe millioen frank.
Dan itoe, boekanlah ada baginda poenja niat jang paling taroetama. Di Ostende, di Villefranche, di Côte d'Azur, dan djoega di laen-laen tempat, ia diriken berbagi-bagi astana jang indah sekali. Dan apabilah ada ini atawa itoe jang menghalangken ia poenja niat, samoea lantas misti mengalah, itoe ia tida maoe ambil perdoeli. Begitoelah ia telah paksa pada orang jang poenja Palace Hôtel di Ostende, aken rombak ia poenja satoe tingkatan roemah, malaenken dengen mengasi sebab, soepaja
