— 78 —
„Sekarang, hajoelah madjoeken teroes ini pasoekan,” kata poela Kiong Touw itoe: „soepaja sakali bergebrak kita bisa kasi labrakan jang seroeh.”
Twan Giauw toeroet adviesnja itoe kawan, maka semoea pasoekannja dititahken madjoe mengadjer.
Tapi pasoekannja Kimgo jang dipimpin oleh orang-orang gaga, sabentaran sadja telah linjap, maka tinggal pasoekan Siamlo jang masoek ka dalem teloek dangen menbilak-biloek ka sana sini, aken soesoel ka mana perginja itoe kapal-kapal moesoe jang merat.
Sigra djoega itoe kapal perang Siamlo telah sampe ka sabla dalem, dimana ia dapetken satoe benteng jang tegoe. Di atasnja benteng itoe ada kaliatan soeda diatoer pendjagahan dan ada tiga Hohan jang lagi menoenggoe kadatengannja.
Hohan itoe boekan laen dari Lie Tjhoen, Ko Tjeng dan Hwa Hong-tjoen. Kiong Touw jang beradat sombong lantas soeroe tentaranja mendarat, maski soeda ditjega oleh Twan Giauw, tapi ia tida ladenin dan kata: kaloe tida maoe madjoe sekarang, maoe toenggoe kawan lagi.
Sigra djoega soldadoenja toeroen dari kapal dan menjerang itoe benteng. Tapi maski begimana djoega, itoe benteng jang tegoe tida bergerak
