— 75 —
itoe tempat. Djoega pada Kimgo, Peksil, Tiauwhi dan Tjenggi, ampat ampat poelo jang lebi besar dari doeapoeloe poelo taloeken laen dan pernahnja ada di ampat pendjoeroe dari itoe negri, diwadjibken moesti dateng menoeloeng. apabila satoe koetika Siamlo diserang moesoe. — Sedeng Siamlo poen melindoengken sabrapa bisa pada itoe poelo-poelo dan membri pertoeloengan, kaloe itoe poelo-poelo jang mendjadi djadjahannja diganggoe oleh laen negri.
Begitoelah waktoe denger kabar Swa Liong telah binasa dan Kimgo dirampas oleh Hoenkang liong itoe radja djadi terkedjoet, maka dengen tjepet laloe diboeka permoesjawaratan pada sakalian mantri-mantrinja boeat berdami.
Semoea mantri lantas berhadlir, dan radja laloe menanja bagimana pikirannja marika itoe.
Sinsiang Kiong Touw laloe madjoe ka depan dan kata bahoewa Kingo itoe sabagi pelindoeng dari ini negri. Maka kaloe Kimgo terlepas, negri Siamio bisa terantjem bahaja jang boekannja ketjil.
„Tapi itoe pasoekan Tay Song, jang maski soeda dapet poelo Kimgo, masi belon taoe keadahan tempat jang sabenernja, kerna marika tida mengenal petah boeat di sini,” kata poela itoe mantri besar: „maka sabelon kadoedoekannja djadi tegoe, baek toeankoe lantas kirim angkatan perang boeat serang padanja.”
