— 51 —
„Sekarang sabagian besar moesoe goenaken tenaganja boeat mendjaga di moeloet moeara, sedeng di dalem tentoe tida diatoer apa-apa. Dengen goenaken ini waktoe jang baek, di waktoe sepi akoe boleh masoek bersama-sama Tong Beng dengen ambil djalan di dalem aer, sasampenja di dalem akoe nanti goenaken api boeat bakar itoe roema-roema, nistjaja moesoe djadi kaloet. Dan dalem waktoe begitoe, Koko boleh menjerang dengen antero pasoekan, maka sakali sadja kita madjoe, akoe kira Kimgo lantas terdjato ka tangan kita.“
Lie Tjhoen dan begitoe poen jang laen-laen, semoea menjataken satoedjoe dengen ini daja, maka titah-titah jang perloe laloe diatoer. Antero pasoekan dalem tempo sabentaran sadja soeda bersiap, tinggal menoenggoe waktoenja sadja.
Begitoelah waktoe moelai sepi, itoe doea soedara laloe boeka badjoe dan masing-masing selipken golok pendek, toeroen dari kapal dan djalan di dalem aer. Boeat djalan di dalem aer marika memang pande sekali, sedeng oempan api, jaitoe kaen-kaen jang tertjeloep soeda ada di tangannja.
Sasampenja di pinggiran marika angkat sedikit kapalanja boeat dapetken napas. Di sitoe ada kaliatan Swa Liong jang lagi atoer pendjagahan sambil moendar mandir, sedeng bebrapa solda-
