— 29 —
„Sabentar Tjiongwie aken dapet taoe,“ demikianlah itoe djoeroemoedi mendjawab: „sabentar lagi sadja. Troesa tanja, troesa tanja“
Tentoe sadja ini penjaoetan membikin orang jang tida taoe, djadi bertamba-tamba kaget dan heran. Lie Tjhoen, Hoei Po dan jang laen-laen memandang ka kiri kanan, blakang dan depan, tapi tida ada kaliatan apa-apa. Kaloe brangkali ada laen kapal, brangkali marika djadi katakoetan lantaran badjak. Tapi ini tida, tida sama sekali.
Sembari oetjapken itoe perkatahan-perkatahan jang paling blakang, si djoeroemoedi menoendjoek ka laoetan, soeatoe tempat jang tida sabrapa djaoe dari sitoe.
Tong Beng dan Tong Wie pada menengok. Lie Tjhoen dan sedereknja poen memandang ka tempat jang dioendjoek. Berbareng itoe, aer laoet jang baroesan dioendjoek djadi bergojang keras.
Dalem itoe saät lantas dateng ombak besar dan geloembang jang sabesar-besar goenoeng, dengen soeara gemoeroenja aer jang begitoe keras. Hingga orang-orang jang tiada biasa maen di laoet tentoe djadi katakoetan, sedeng jang soeda biasa poen, masi begitoe takoet.
Waktoe ombak jang sabesar goenoeng itoe petja, aernja moentjrat ka kapal-kapal dan orang jang ada di sitoe djadi bergojang keras, dan
