— 256 —
jang soeda tida mempoenjai kapala, lantas lari tertjere-berei sambil lemparken sendjata, sedeng jang binasa boekan sedikit.
Dengen tida memboewang tempo Kim Tjoe laloe madjoeken barisannja ka kota Honglinghoe dan ini kota ada terdjaga oleh Sinuw Tek-lie, jang satelah denger moesoe dateng menjerang. lantas naek ka atas kota aken meliat.
Kim Tjoe prenta barisannja madjoe teroes Tapi sebab dari dalem kota tida ada jang kaloear maka soldadoe Kimkok lantas koeroeng itoe kota dengen rapet, hingga Siauw Tek-lie jang denger itoe kabar, djadi kaget.
„Kaloe begitoe,“ kata itoe panglima Liauw: „sekarang kita moesti oentoeng-oetoengan menjerang kaloear, sebab kaloe berdiam sadja toch moesti binasa. Maka dari pada moesti binasa tjara begitoe, hajoelah kita bertempoer mati-matian.“
Panglima-panglima ketjil jang ada di bawah prentanja, semoa njataken moefakat dan begitoelah dengen membawa sadjoembla balatentara Tek-lie lantas boeka pintoe kota aken menjerang kaloear.
Dengen lakoe jang begitoe nekat, ia bisa djoega terlolos dari koeroengannja moesoe. Kamoedian ia lariken koedanja menoedjoe ka satoe djoeroesan, dengen tinggalken itoe kota jang dirampas moesoe.
