— 563 —
dari mana, Houw-jan Tjiak soeda menjerang dengen gaga bersama jang laen-laen, sedeng tida lama kamoedian ada lagi kaliatan doea panglima moeda, jaitoe Houw-jan Giok dan Tjhie Seng.
Panglima-panglima Kim jang meliat datengnija moesoe samingkin lama djadi bertamba besar, djadi merasa koeatir, sedeng Ouw Oh-ma melawan dengen sengit, tapi maski bagimana gaga djoega itoe djendraal, ia tida bisa lawan menang dan lantas lari.
Tentara Kimgo jang soeda naek lantas membasmi kalangkaboet dan mengedjer djoega pada moesoenja.
Sasoedanja mengedjer djaoe djoega dan liat moesoe pada lari toempang sioer, Lie Tjhoen laloe tarik antero pasoekannja, kerna inget: jang Baginda Keizer lagi sedeng katakoetan dan moesti lantas dibri hiboeran.
Sasoenggoenja djoega ada begitoe roepa, kerna itoe waktoe Baginda Song Ko-tjong memang lagi sanget iboek mendenger itoe riboet-riboet. Dengen badan goemeter itoe djoengdjoengan berkata pada mantrinja:
„Dengerlah soearanja moesoe jang mengedjer soeda djadi samingkin deket, tida lama tentoe aken sampe, sedeng di sini tida ada panglima jang gaga jang boleh diandelin, dari pada moesti dapet maloe, mana lebi baek tim binasaken diri."
