— 560 —
Kamoedian orang landjoetken itoe perdjamoean dengen arak Hiang-swat-tjioe, jang sasoedania minoem lagi tiga mangkok, Tosoe itoe berpamitan boeat berlaloe, katanja hendak pergi ka Lohoesan aken meliat boenga bwee.
Sasampenja di loear itoe orang pertapahan jang baroesan oendjoek kasaktian lantas toenggang saekor boeroeng Pekhok poeti dan naek ka oedara hingga sabentaran sadja tida kaliatan lagi.
Lie Tjhoen dan jang laen-laen masi merasa heran dengen itoe kedjadian jang baroesan, sabelonnja perdjamoean itoe ditoetoep, satoe djoeroe kabar membri taoe, bahoewa di Bolitan Keizer Song lagi dapet soesa dikepoeng oleh panglima-panglima Taykimkok, hingga keadaännja baginda ada sanget berbahaja.
Semoea orang djadi terkedjoet dan memandang satoe pada laen.
Jan Tjeng dan Tja Tjin laloe bangoen dari tempat doedoeknja sambil berkata :
„Kaloe bener Baginda Keizer lagi dapet Kasoesahan, panteslah kita-orang pergi menoeloeng dan anterken poela sampe di kratonnja, kerna kita ini poen masi teritoeng rahajat Taysong.”
„Itoelah ada dengen sapantesnja,“ saoet jang laen-laen sambil berbangkit.
„Kaloe begitoe, kita-orang tida boleh berlambat,” kata Lie Tjhoen, jang lantas prenta semoea
