— 43 —
"lebi baek waktoe malem kita menginep sadja di roema makan, maski kaloear ongkos, ada lebi baek dari pada bermalem di post kapoenjahannja negri."
"Akoe satoedjoe dengen kothaysoe poenja pikiran,” saoetnja itoe kawan: "laen dari begitoe, haroeslah kita mendjaga diri, sebab sekarang kita soeda tida mempoenjai kakoeasahan apa-apa, jang boleh membikin orang djadi takoet atawa mengidahi.”
Sasoedanja berdami, Tjoa Keng kaloearken oewangnja dan briken pada oppas pengiringnja, sambil berkata:
"Trimalah ini sedikit oewang boeat kaoe poenja ongkos minoem arak, jang akoe harep djoega kaoe soedi perlindoengken dirikoe, sobat."
"Oh, itoelah troesa koeatir,” saoetnja si oppas, jang ambil djoega itoe oewang dan lantas dibagi-bagi antara temennja.
Sedeng Tjoa Keng dan Ko Kioe, jang doeloe ada mempoenjai kabesaran tida berwates, bisa merasa takoet dan maoe minta perlindoengannja si oppas, sabaliknja Ong Hoe, Jo Tjian dan Nio Soe-seng, masi sadja bawa tingka jang agoeng-agoengan. Dalem sapandjang djalan di waktoe malem marika bermalem sadja di post jang negri sadiaken, dan sedikit poen tida merasa koeatir pada bahaja jang mengantjem dirinja.
