— 312 —
dan poetra lantas sodja pada semoea orang-orang gaga jang telah menoeloeng padanja.
„Sekarang semoea oeroesan soeda beres,“ kata Kwan Siang: „maka sabelonnja kita orang berangkat, harep Tee Wantiang soeka djalan doeloean boeat membri taoe pada kita poenja sakalian Hengte di Tenghoensan, jang kita-orang bakal sampe tida lama kamoedian.“
,,Benerlah,“ kata Jan Tjeng.
Tee Tjong merasa moefakat dan lantas djalan doeloean. Berbareng itoe, orang-orang jang ada dalem gredja lantas bersiap boeat berangkat.
Hong Hoe-twan jang memang tida taoe bakal diatoer ini tipoe, telah poedji atas bagoesnja ini akal jang didjalanken dengen berhasil. la kata, bermoela ia kira bener-bener maoe dikaloearken oewang teboesan, sebab tida ada saorang jang membri taoe padanja, bahoewa Jan Tjeng maoe goenaken ini tipoe.
Itoe waktoe kandaran-kandaran boeat orang prampoean telah sadia. Song Andjin bersama Lu Siotjia dan Ong Po, berdoedoek dalem satoe kreta, barang-barang ditaro dalem laen kandaran, sedeng orang lelaki toenggang koeda.
Sebelonnja berangkat Song An-peng panggil itoe Tosoe jang djaga gredja, padanja dibriken oewang limapoeloe tail perak, sabagi tanda trima kasi, jang marika soeda dapet tempat dan rawatan baek.
