— 304 —
dalem dan akoe nanti panggil.“
Selang sasaät Tjhie Seng dan Houw-jan Giok telah kaloear sambil membawa oewang dan taro kantong itoe di atas medja.
Tjan Sie-hiong lantas itoeng itoe djoembla, kamoedian ternjata masi koerang sariboe limaratoes tail perak.
„Bener,“ kata Tjhie Seng: „ini oewang doea-riboe tail ada boeat peneboesan Song Andjin, dan boeat harga penggantian koeda, masi koerang.“
„Tapi lekaslah sadiaken!“ menjentak Tjan Sie-hiong dengen soeara keras.
Doea orang moeda itoe lantas berlaloe. Tida lama kamoedian marika datang kombali bersama-sama Kwee Keng.
Ini orang kaparat jang bekas djadi Tikoan, waktoe dibawa kaloear tida brani angkat moeka. Tjan Sie-hiong jang liat begitoe, djadi kaget tertjampoer heran, kerna tida mengarti bagimana Kwee Keng boleh ada di ini tempat. Maka ia laloe dateng menghamperi dan menanja, mengapa Tikoan Loja boleh ada di sini,
Sabelon petanjahan ini didjawab, orang-orangnja Kwan Siang jang soeda diatoèr lantas mengoeroeng itoe gredja, di mana Tjan Sie-hiong dengen laskarnja ada berdiam. Sedeng Tjhie Seng dan Houw-jan Giok satelah denger tanda rasia jang diboenjiken, lantas hantem kapalanja itoe
