— 271 —
bener. Maka sigra djoega marika ambil poetoesan boeat berangkat ka itoe goenoeng. Pada An-peng dipesen boeat mendjaga diri dan djangan terlaloe bersedi-sedi, kerna perginja ini paling lama sapoеloe hari, soeda bisa kombali.
Song An-peng memanggoet dan perhatiken pesenannja itoe soedara.
Kamoedian Houw-jan Giok pesen djoega pada Ong Poh, boeat mendjaga Lu Siotjia hati-hati, kerna ia berdoea Tjhie Seng maoe pergi ambil pasoekan. Djika kota Koensengkoan soeda terpoekoel petja dan koelawarganja Song An-peng telah tertoeloeng, baroe iaorang sama-sama balik ka Tenghoensan.
Pada Koen Ko diprenta balik lagi ka itoe kota, boeat katemoeken pada Soehoangwe aken membri taoe, jang pertoeloengan sigra djoega nanti dateng. Maka biarlah marika bersabar dan senangken hati.
Sasoedanja membri pesenan, Houw-jan Giok kaloearkan lima tail perak dan briken oewang ini pada Tosoe boeat ongkosnja merawati ini tetamoe jang ditinggalken. Sasoedanja itoe, marika laloe naek koeda dan berangkat djalan.
Berdjalan kira-kira doeapoeloe li, marika katemoe pada Tee Tjong jang lagi berdoedoek di post tempat pembrentian. Dan pertemoean ini tentoe sadja membikin satoe pada laen djadi girang sekali.
