— 265 —
„Koko poenja koelawarga tentoe soeda menjingkir ka laen tempat," kata ini soedara angkat kamoedian: „maka hal itoe tiada oesah terlaloe disedihi, kerna lambat laoen tentoe aken bertemoe kombali. Maka sekarang, baeklah kita madjoe lagi, kerna hari soeda ampir sore dan di sini tida ada tempat boeat bermalem.“
An peng tida menjaoet, hanja manggoeti sadja kapalanja, soeatoe tanda aken menoeroet, ka mana djoega dirinja maoe diadjak.
Sigra marika berdjalan kombali.
Liwat kira-kira tiga paal, iaorang telah sampe di satoe tempat. Satelah liat ada gredja, Houw-jan Giok berdoea Tjhie Seng laloe menghampirken dan liat di atas pintoenja ada tertoelis ampat hoeroef besar, jang boenjinja: Goan Lie Heng Kiong.
„Kaloe begitoe, kita ini telah sampe di doesoen Hoantotjoen,“ kata Song An-peng, jang djoega ada toeroet liat boenjinja itoe toelisan.
„Doesoen Hoantotjoen?“ mengoelangken itoe doea soedara jang laen.
„Ja, kerna di ini doesoen ada itoe gredja," saoetnja.
Lebi djaoe An-peng tjeritaken, bagimana dalem ini gredja doeloe Song Kang telah dapetken boekoe Thiansi, dan dengen perhatiken boenjinja itoe kitab perang, Song Kong-beng bisa atoer barisan-barisan boeat kalaken moesoenja.
