— 243 —
,,Itoe di depan ada satoe doesoen, maka baeklah kita lariken biar sedikit kentjeng, soepaja bisa lekas sampe dan tjari satoe roema makan."
Houw-jan Giok dan Song An-peng toeroet itoe perkatahan dan teroes lariken koeda itoe dengen kentjang, jang tida lama bener telah sampe di depan waroeng arak, dimana marika laloe toeroen dan iket masing-masing poenja koeda di depan.
Tjhie Seng prenta djongos sadiaken makanan jang enak bersama arak boeat tiga orang poenja makan. Prenta ini dilakoeken dengen tjepet, jang tida lama kamoedian djongos itoe bawa kaloear samangkok besar daging reboes, satoe pinggan bakpauw dan bebrapa pirang daging masak, jang tertjampoer dengen daging kambing dan ajam.
Baoenja makanan-makanan itoe amat sedap dan membikin terboeka napsoe, maka Houw-jan Giok laloe toewang itoe arak ka tjawan jang memang telah sadia.
Marika makan dengen enak. Sapandjang dahar itoe tida sempet boeat beromong-omong, kerna peroet amat lapar. Sasoeda arak jang botol pertama abis, baroelah diminta lagi satoe botol arak dan tamba sapiring daging reboes.
Itoe djongos lantas membri taoe, bahoewa arak jang sekarang masi ada, tjoema arak jang lebi keras. Kerna arak jang sedeng, tjoema itoe sadja satoe botol. Dan kaloe boleh ia nanti bawaken.
