— 64 —
betoelnja maoe ka manatah, maka boleh djadi kailangan iboe di ini tempat?"
Siauw-tjhit laloe tjeritaken satoe persatoe siapa adanja ia poenja diri, jang sabenernja ada mendjadi sala satoe dari soedara angkatnja Song Kang di Liangsan. Blakangan pegang djabatan Tongtjhi dan kamoedian letaken pangkat itoe aken poelang ka kampoeng sendiri. Dan pada brapa hari jang laloe, lantaran Thio Kan-poan toedoeh ia sabagi begal, maka ia soeda kasi adjaran pada itoe pembesar.
Oleh kerna dapet itoe labrakan, achirnja Thio Kan-poan soeda djadi sakit hati dan satronin doesoen Tjiokkiat-tjoan boeat tangkep padanja. Tapi itoe pembesar ia soeda boenoe bersama bebrapa orang soldadoenja, hingga sekarang ia djadi boeroen bersama-sama itoe orang toea. Ia sendiri tida taoe maoe pergi ka mana, djadi berangkatnja ini tida taoe ka mana toedjoeannja.
Begitoelah sembari beromong-omong dan satoe pada laen menjeritaken keadahan sendiri, doea orang gaga ini lantes djadi bersobatan dari satoe pada laen soeka boeat saling toeloeng, djika ia orang ada di dalem soesa.
,,Kaloe kaoe djoega belon mempoenjai tempat jang katentoean," kata Siauw-tjhit achirnja: ,,baeklah kaoe toenggoe sabentaran di sini, sampe akoe dapet tjari ka mana perginja iboekoe itoe.
