— 49 —
,,Iboe!!......... iboe!!!!......... Kaoe ada dimana??........"
Djoega ini seroehan jang beroelang-oelang tida kadengeran disaoetin.
Sekarang Siauw-tjhit djadi lebi koeatir dan lantas pergi ka blakang sambil bertreak-treak memanggil itoe orang toea. Sasampenja di pintoe blakang, ia boeka pintoenja dan meliat di sakoeliling tempat, dimana ada kaliatan oetan alang-alang sadja.
Melit itoe papoehoenan ketjil jang berdaon lebat, mendadak ia dapet satoe ingetan jang membikin hatinja djadi amat kaget, takoet dan boeloe badannja rasa mengkirik.
Begitoe lama ia idoep di doenia, baroe sekarang ia dapet rasa takoet. Itoe katakoetan boekan boeat diri sendiri, sebab kaloe boeat dirinja, siapa djoega ia tida takoeti, hanja takoet boeat tertjinta, koetika dapet inget bagimana doeloe waktoe Lie Koei djalan boeron sambil menggendong iboenja, di tenga perdjalanan boeat pergi ka Liangsan, lantaran aoes itoe orang toea lantas brenti dan soeroe anaknja pergi ambil aer.
Lie Koei toeroet itoe prenta dan lantas berlaloe, sedeng iboenja ia tinggalken di tempat pembrentian.
Satelah itoe Lie Thi Goe—demikianlah nama jang orang briken pada Lie Koei, jang berarti
