— 231 —
boekan laen hanja saban hari sasoedanja soeamikoe pergi ka kantoor, kaoe moesti dateng ka mari boeat temení akoe minoem arak doea-tiga gelas; begitoe akoe poenja maksoed, mengarti ?”
„Oh, itoelah ada satoe kahormatan besar jang akoe tida bisa trima,” kata Touw Hin sambil memanggoet dan lantas permisi boeat berlaloe.
Meliat begitoe, Giok-go mengelah napas sambil mengawasi djalannja Touw Hin, jang ia anggap bener-bener ada terlaloe bodo. Kerna dengen itoe perkatahan-perkatahan jang dioetjapken baroesan soeda sampe njata, bahoewa dirinja ada ditjintaken. Tapi masalah tida mengarti?
„Apa brangkali itoe orang baroe bisa djadi mengarti,” kata poela ia dengen menggerendang : „kaloe akoe bilang: he lelaki moeda jang gaga, akoe soeka dan tjinta padamoe, marilah ikoet akoe ka dalem kamar aken tidoer sama sama. ― Begitoe brangkali baroe ia mengarti dan taoe maksoedkoe. Ah, itoelah terlaloe.........”
Touw Hin tida denger itoe perkatahan dan berdjalan teroes. Sasampenja di dalem pondok, kerna ia poen memang boekan tinggal di pendjara, laloe berdoedoek deket itoe sobat boeat beromong-omong.
Sabagi permoelahan bitjara, Jo Liem tanjaken bagimana pakerdjahannja Touw Hin di sini. Dan waktoe Touw Hin kasi taoe, jang ia tjoema bekerdja sabagi orang soeroe-soeroehan, Jo Liem laloe berkata poela:
